Oliy taʼlim tashkilotlarida “Registrator ofisi” toʻgʻrisida

NAMUNAVIY NIZOM

          1. Umumiy qoidalar

1.1. Oliy taʼlim tashkilotlarining (keyingi oʻrinlarda – OTT deb yuritiladi) “Registrator ofisi” (keyingi oʻrinlarda – Ofis deb yuritiladi) talabalikka qabul, oʻquv jarayoni va talabalarga xizmat koʻrsatish, akademik faoliyatni tashkil etish hamda taʼlim jarayonining ochiqligi va shaffofligini taʼminlash, tizimda byurokratik toʻsiqlar yuzaga kelishini oldini olish va tahliliy maʼlumotlarni shakllantirish, shuningdek, qaror qabul qilish jarayonini optimallashtirish kabi vazifalarni amalga oshiruvchi OTTning tarkibiy tuzilmasi hisoblanadi.

1.2. Ofis oʻz faoliyatini Oʻzbekiston Respublikasining Konstitutsiyasi, Oʻzbekiston Respublikasi “Taʼlim toʻgʻrisida”gi Qonuni, Oʻzbekiston Respublikasi Prezidentining Farmon, qaror va farmoyishlari, Oʻzbekiston Respublikasi Vazirlar Mahkamasining qarorlari, Oʻzbekiston Respublikasi Oliy taʼlim, fan va innovatsiyalar vazirligining Hayʼat qarorlari, buyruqlari, OTT Nizomi, Kengashi qarorlari, OTT rektori buyruqlari hamda mazkur Nizomga muvofiq olib boradi.

1.3. Ofis faoliyatiga OTT rektori (direktori) tomonidan tayinlanadigan va lavozimidan ozod etiladigan Ofis boshlig‘i rahbarlik qiladi. Ofis boshlig‘i, prorektorlar, fakultet, kafedra, oʻquv-uslubiy boshqarma va boshqa taʼlim tuzilmalari bilan hamkorlikda ishlaydi.

1.4. Mazkur nizom OTTlar o‘zlarining “Oliy ta’lim tashkiloti “Registrator ofis”i to‘g‘risidagi nizom”ini ishlab chiqishda tavsiyaviy xarakterga ega.

1.5. OTTlar xizmat turlarining xususiyatidan kelib chiqib, ko‘rsatiladigan xizmatlarning qancha muddatda bajarilishini belgilashi kerak.

2.1. “Registrator ofisi”ning asosiy tarkibiy tuzilmasi quyidagilar hisoblanadi:

Xizmat koʻrsatish (front office) boʻlimi;

Maʼlumotlar bazasi (back office) boʻlimi.

Bunda, OTT tomonidan jamoatchilik asosida yuqoridagi bo‘limlar tarkibida sektorlar tashkil etilishi mumkin.

“Registrator ofisi” xodimlari belgilangan tartibda OTT rektorining buyrugʻi bilan tayinlanadi va vazifasidan ozod qilinadi.

Xodimlarga yuklatilgan ish majburiyatlari lavozim yoʻriqnomasi bilan belgilanadi.

2.2. “Registrator ofisi” xodimlari tarkibi:

“Registrator ofisi” boshlig‘i;

Xizmat koʻrsatish (front office) boʻlimi boshligʻi;

Maʼlumotlar bazasi (back office) boʻlimi boshligʻi;

Menejerlar.

Menejer lavozimiga ishlab chiqilgan meʼyorlar asosida shtatlar belgilanadi.