Prezident rahbarligida ma'naviy-ma'rifiy ishlar ta'sirchanligini yanada oshirish borasida yig‘ilish o‘tkazildi. Tadbirda Respublika Ma'naviyat va ma'rifat markazi barcha hududiy kengashlarning, vazirlik, idora va tashkilotlarning ma'naviy-ma'rifiy faoliyatini muvofiqlashtirib borishi belgilandi.

«Hech kimga sir emas, ma'naviyat targ‘ibotchisi bo‘lish kishidan katta bilim va salohiyat, mahorat va tinimsiz aqliy mehnatni talab etadi. Lekin biz ko‘p yillar ma'naviyat va ma'rifat sohasi xodimlarining mehnatini munosib rag‘batlantirishga yetarli e'tibor qaratmadik. Endi ana shu muammoni hal etish vaqti keldi.

Buning uchun joriy yildan Ma'naviyat va ma'rifat respublika kengashiga qarashli davriy nashrlar ijodiy xodimlarining oylik maoshlarini oshirish kerak. Moliya vazirligi, Ma'naviyat va ma'rifat markazi bir oy muddatda ushbu masala bo‘yicha qaror loyihasini kiritsin.

Shuningdek, xususiylashtirishga qo‘yilgan «Ma'naviyat» nashriyotini markaz tasarrufiga o‘tkazish va uning faoliyatini qo‘llab-quvvatlash zarur. Markaz bilan hamkorlikda barcha korxona va tashkilotlarda aniq reja asosida «Ma'rifat soati»ni o‘tkazish yo‘lga qo‘yiladi.

«Ma'rifat soati»ga kimlar jalb qilinadi? Kimlar joylarga borib ma'ruza qiladi? Ularni kim kutib oladi, qayerda, qancha uchrashuv bo‘ladi? Ma'ruzachilar uchun zarur tarqatma materiallar, buklet, audio va video materiallarni kim tayyorlaydi? Vazirlar Mahkamasi va markaz mahalliy hokimliklar bilan birgalikda ana shu masalalar yechimi bo‘yicha aniq taklif kiritsin», degan davlat rahbari.

«Tarbiyada tanaffus bo‘lmaydi, deymiz. Lekin, ma'naviy-ma'rifiy ishlarni tashkil etishda bu qoidaga amal qilinmayapti. Bu borada bog‘cha, maktab, oliy ta'lim, mahalla – har biri alohida ish olib boryapti.  

Shuning uchun ma'naviy-ma'rifiy ishlarning yagona tizimini yaratish, unda har bir mas'ul idoraning vazifasi va birgalikda amalga oshiriladigan chora-tadbirlarini aniq belgilab qo‘yish zarur.

Xususan, maktabgacha ta'lim tashkilotlarida jajji farzandlarimizni milliy qadriyatlar ruhida tarbiyalash maqsadida Markaz Maktabgacha ta'lim vazirligi bilan birgalikda ma'naviy-tarbiyaviy ishlar tizimini yaratishi kerak.

Bunda, ayniqsa, xususiy va davlat-sheriklik asosidagi bog‘chalarga ma'naviy va metodik yordam ko‘rsatishga alohida e'tibor qaratish lozim. Joylardagi Ma'naviyat va ma'rifat kengashlari bu masalaga alohida e'tibor qaratishi kerak. Shu maqsadda, Kengash a'zolarini har bir maktabgacha ta'lim tashkilotiga doimiy biriktirib, mas'uliyatini belgilab qo‘yish zarur», degan prezident.

Davlat rahbari telefonlar yoshlar hayotining ajralmas qismiga aylanganiga e'tibor qaratdi.

Bugun bolalarimizni maktab, ota-ona yoki institut emas, aksariyat holda qo‘lidagi telefon tarbiyalamoqda. Mobil telefon endi oddiy aloqa vositasi emas, ko‘pincha yot mafkurani tarqatadigan qurolga aylanmoqda.

Ma'naviyatimizga mutlaqo begona bo‘lgan zararli g‘oyalar chegarani buzmasdan, bildirmasdan xonadonimizga, jamiyatimizga kirib kelyapti. Soat sari emas, minut sari kirib boryapti.

Bularning barchasi biz uchun ogohlik qo‘ng‘irog‘i bo‘lib yangrashi zarur», – ta'kidladi Mirziyoyev.