Bugun 29-sentabr O'zbekkiston Milliy universiteti Jizzax filialining katta faollar zalida professor-o'qituvchilar va xodimlar uchun 1-oktabr “O'qituvchi va murabbiylar kuni” munosabati bilan bayram tadbiri bo'lib o'tdi.

Tadbir avvalida O'zMU Jizzax filiali direktori O. Turakulov barcha ustozlarga tabrik yo'lladi.

“ Siz azizlardek fidoiy, zahmatkash, o‘z shogirdlariga bilim berish barobarida ular qalbiga eng go‘zal ezgu xislatlarni, mehr-oqibat va odamiylik tuyg‘ularini singdirib borayotgan yuksak ma’rifatli insonlar bilan bir safda ekanligimdan faxrlanaman va Sizlarni qadrlayman.

Oliygohimizda ta’lim samaradorligini oshirish, ilm-fan rivojini yuksaltirish, zamonaviy fan sohalarini egallashda, dunyo oliy ta'lim reytingida kuchli mingtalikka kirishdek yuksak marralarni zabt etishimizda Sizlarning salohiyatingiz, iqtidor va mahoratingizga ishonaman.

Bu yorug‘ olamda hammamiz umr bo‘yi o‘rganuvchimiz. Hamisha kimdandir, nimadir o‘rganamiz, kimlargadir namuna, ibrat bo‘lamiz. Barchalaringizni ulug‘ ayyom bilan samimiy qutlab Sizlarga mustahkam sog‘lik, baxt va omad, xonadonlaringizga tinchlik-xotirjamlik, fayz-u baraka tilayman!”

Bayram munosabati bilan filialning bir guruh ustozlari taqdirlandi.

 

Shundan so'ng, uyushtirilgan bayram tadbiri barcha yig'ilganlarga bayramona kayfiyat ulashish uchun kuy qo'shiqlarga ulanib ketdi.