O‘zbekiston Respublikasi Innovasion rivojlanish vazirligi tomonidan 2021 yil uchun tayanch doktorantura va doktoranturaga qabul kvotalari bo‘yicha vazirlik va tashkilotlardan 3 ming 728 o‘ringa buyurtma qabul qilingan.

Moliya vazirligi, o‘z navbatida, byudjet imkoniyatlarini hisobga olgan holda 2021 yil uchun jami 1 ming 800 ta o‘ringa mablag‘ ajratilishini tasdiqladi. Shundan, fan sohasi bo‘yicha tayanch doktoranturaga 365 ta, doktoranturaga 64 ta, ta’lim sohasi yo‘nalishida tayanch doktoranturaga 1 ming 292 ta, doktoranturaga 79 ta o‘rin ajratildi. Bu jami buyurtma berilgan kvotalarning 48,2 foizini tashkil etadi.

Bu haqda Innovasion rivojlanish vazirligi axborot xizmati xabar berdi.

O‘zbekiston Respublikasi Vazirlar Mahkamasining 2017 yil 22 maydagi tegishli qarori bilan tasdiqlangan Oliy o‘quv yurtidan keyingi ta’lim to‘g‘risidagi Nizomga muvofiq, izlanuvchining to‘lov-kontrakt mablag‘lari hisobidan qo‘shimcha qabul kvotasini shakllantirish mumkin.