O‘zbekiston Milliy universiteti Jizzax filialida talabalikka tavsiya etilgan abituriyentlar—1-kurs talabalari uchun tanishuv darslari tashkil etildi. Beg‘ubor hayojon bilan oliygohga ilk bor qadam qo‘ygan talabalarni filial jamoasi kutib oldi. Filialda tanishuv darslarini tashkil etishda karantin qoidalariga qat’iy amal qilish inobatga olindi. 

Jumladan, filialga kiritilayotgan talabalarning tana harorati o‘lchanib, antiseptik vositalar bilan dezinfeksiya qilindi. Shundan so‘ng talabalar auditoriyalarga kiritilib, professor-o‘qituvchilar tomonidan filial faoliyati va yo‘lga qo‘yilgan masofaviy ta’lim tizimi haqida ma’lumotlarga ega bo‘lishdi.

 Ta’lim olish jarayonida zarur bo‘ladigan adabiyotlar ro‘yxati ham batafsil aytib o‘tildi. Mana shu tarzda tanishuv haftaligi davomida talabalikka qabul qilingan abituriyentlar uchun onlayn ta’lim olish ko‘nikmasi shakllantiriladi. Birinchi bosqich talabalari bugungi tashkil etilgan tanishuv darslari orqali  o‘quv jarayoniga tegishli barcha kerakli ma’lumotlarga ega bo‘lishdi.Talaba yoshlarning filial binosida o‘tgan ilk kuni zavqli kechdi deb umid qilamiz. 

Filial Axborot xizmati